跤踏史地有一ê 向望，就是𤆬囡仔行過台灣大細條巷仔街路，佇台灣ê每一ê所在，講台灣ê故事予in聽。

跤踏史地有一ê 向望，就是𤆬囡仔行過台灣大細條巷仔街路，佇台灣ê每一ê所在，講台灣ê故事予in聽。 ​ 若是欲向這ê向望行去，有一个前題，是台灣愛一直親像這馬按呢，是一个民主、自由、多元ê 台灣。 ​

​今仔日佮同伴咧討論台灣史ê教案，講著廖文毅ê台獨案。有一位同伴講： ​ 「我實在是hông洗腦洗甲足清氣，若是聽著台獨兩字，攏會驚驚—ê。」 ​ 真正！我mā是！講著台獨，敢若咧做歹代誌。 ​ 前幾工有一个大學教授pho文，伊講國民黨ê宣傳實在是誠有效。干焦佇台獨ê 後壁接「份子」兩字，就予人感覺著滿滿—ê 、咧共人kiâu —ê感覺。「份子」兩字就是「共人破壞」、「黑道」、「足危險足歹—ê」這種負面ê感受。用佇遮，自然而然會影響著逐家ê想法，共台獨兩字變成一種無法度通講、袂用eh講—ê，危險ê詞。 ​ 若無，統一後壁是按怎無愛接「份子」兩字？維持現狀後壁哪會無愛接「份子」兩字？和平ê 後壁哪會無愛接「份子」兩字？ ​ 其實，阮咧討論—ê，只不過是，實實在在、明明白白，事實上有佇台灣發生ê 代誌。阮干焦是共一寡人，in咧想啥物？咧創啥物？後尾發生啥物代誌？干焦像按呢ê代誌提出來討論，抑無牽涉著觀點，哪會按呢就感覺歹勢歹勢，若咧做歹咧？ ​ 是啥物款的ê 社會環境佮氛圍、教育、成長ê 過程，造成這種結果？ ​

60年代出世的我，讀冊是讀「國立編譯館部編版」ê 課本（無細膩講出年歲😱）。我國中時陣，會用eh共中國每一个省in ê簡稱佮特色，閣有鐵支路、猶有河川ê 名⋯攏共背—起-來，考試足gâu寫—ê。 ​ 若是以前，講—著二戰時，問空襲台灣ê 國家是佗一个？我可能會感覺「日本」mā是一个合理ê答案。🤪 ​ 我捌投過馬英九（無想欲講幾擺），猶閣有「許信良/朱惠貞」這種組合，mā捌投過陳文茜ê 立委票⋯⋯ ​ 過去一直用「政治足垃圾—ê，離愈遠就表示愈清白」ê 心情咧過生活。一直到十冬前，佇某一个研討會，聽著「以前無聽過、m̄知影」ê 觀點，感覺足好玄，想欲知影閣較濟ê代誌，紲按呢開始咧看台灣史ê冊⋯⋯然後⋯⋯ ​ 一直咧揣答案，揣無煞。 一旦覺醒，就無可能回頭。 ​ ​

是袂揣到佗位去？知影閣較濟是會用eh 創啥？講遮—ê歷史，敢有啥物意義？ ​ 遮—ê問題，每一个人攏有家己ê 答案。我家己ê 答案是： ​ 愈知影閣較濟—ê 台灣ê代誌，就會愈愛台灣。 ​ 佮同伴當咧討論ê 台灣民主史課程，直欲開課ê 系列是1940-60年代。彼是一个台灣上驚惶的年代，對阮來講，mā是一个欲講起來最上困難ê 年代。 ​ 彼个困難ê意思，是講阮上課愛真細膩去注意用詞。阮欲講歷史m̄是為著欲去攻擊móo乜人，只是人會好玄，過去到底發生啥物代誌？是按怎阮呔會啥物攏毋知？ ​ 外省—ê 白色恐怖ê 案件、眷村ê 歷史、八二三炮戰⋯⋯阮攏會講。佇仝一片土地生活—ê人，就是自己人，就是台灣人。阮會好奇，想欲知影你ê 過去、聽你講故事。mā願意和你坐落來，做伙討論台灣後一步欲按怎行。 ​ 阮leh討論ê 過程中，捌為著外省老兵仔ê 處境，咧流目屎；mā捌足受氣—ê，氣phut-phut有這款ê 統治者，用遐爾仔冷酷佮殘忍ê手段對付人民；閣較濟ê時陣，阮是感覺足hàm—ê、想袂通、閣足感動、受著鼓勵、閣有一寡毋甘⋯遮爾濟—ê 前輩為著台灣ê 的未來，甘願冒險、放捒家庭、忍受著折磨，就是為著心肝仔內ê 理想，想欲為著台灣閣做寡啥，想欲留一个閣較有希望ê 台灣予囝孫。 ​ 我家己偷偷咧想，這tsām仔徛出來ê 大罷免ê 志工in，敢就是仝款ê心情？見擺阮咧討論前輩ê代誌，足想欲知影但是永遠無可能有答案—ê，in為啥物有法度遐爾仔勇敢徛—出來？in ê 心情，敢講其實這馬就展現佇阮面頭前？ ​ 就是，親像咱善良ê 台灣人，若是看著路—nih ê阿婆跋倒，一定會隨衝過去，共人h扞—起來，根本袂想遐濟，彼種簡單甲無啥通解說ê善良佮熱情，按呢爾？ ​ ​

我捌看過一个足古錐ê講法，咧解說講台灣人是按怎遐爾仔閣歹閣赤？一日到暗拍來拍去，拚生拚死，雄介介，予統治者煩惱甲袂死。 ​ 彼攏是因為，台灣人是「冒險者」ê 後代。 ​ 足久足久以前，為著欲食飽會當活—落去，咱ê祖先是一tīn敢用性命去冒險，渡過黑水溝ê 人。In毋是普通人，是勇敢ê 「欣梅爾」。咱ê 身軀頂，有in ê 「勇敢基因」，mā流著佮in仝款啥物攏毋驚ê 血。 ​ 咱，mā毋是一般ê平常人。 ​ 真正是，莫想欲欺負台灣人。平常時咱攏是會去扞阿婆行車路—ê ，善良ê 人。但是，若是hông惹—到，隨隨就變成彼个徛佇船頭插旗仔，毋知欲行去佗位mā無咧驚，熱血閣勇敢ê 台灣人。 ​ 啥人會當想會到，全台灣有遐爾濟志工願意徛出來，予風吹予雨沃、忍受着生分人無代無誌共你kiâu。一ê 區一ê 區，一張紙一張紙，收集著一百三十萬張連署書。 ​ 毋是一百三十張，mā毋是一千三百張。是一百三十萬張。當初時有啥人敢想有這工？但是，台灣人，勇敢ê 志工，in真正super偉大，世界勇—ê。 ​ ​

捌有長輩問講：「講遮—ê妳敢袂驚？」 ​ 我哪有需要驚啥？我是偌爾仔幸運，出世佇這个時代。遐爾濟遐爾濟ê前輩，用in的性命、血、目屎、規家伙仔⋯ê代價，in已經先替阮行出一條自由民主ê 路。民主和自由對這馬ê阮來講，就親像空氣佮水，彼是在來就有，無必要付出代價。有這款ê生活，彼是in留咱ê禮物。 ​ 我當然mā希望，咱會當繼續徛佇這馬ê 台灣，會當去了解閣較濟ê 過去，會當自由自在講台灣歷史，馬會當予閣較濟ê人，故事聽了閣較愛台灣。 ​ 偏偏，代誌無遐爾仔簡單。 ​ 這一冬偌以來，藍白聯手佇立法院做ê代誌、通過ê法案，攏是咧振動著這馬台灣ê 自由民主。In想欲削弱台灣的ê 國防、破壞台灣ê 財政，予台灣ê 抵抗能力愈來愈軟去⋯閣想欲複製中國對香港ê作法，對法律下手，予人民不敢出聲。 ​ 凡勢你想欲問講，這馬ê 香港，敢有啥物無好？ ​ 前一tsām仔BBC有一篇報導，記者佇街路頂訪問香港人對《基本法》第23條國安罪ê 看法。10個人裡底有9個，聽到這，敢若親像予雷公彈著，慌狂ia̍t手，走緊緊。賰咧一个講：「這無啥物問題啊。」 ​ 按呢，敢真正，無問題？ ​ 咱敢有想欲轉去彼个噤聲ê 年代，乖乖á，恬恬á，按呢就好？ ​ ​

閣轉去頭前ê 問題，知影抑是毋知影台灣過去ê 歷史，敢有啥物差別？是按怎一定愛講遮—ê歷史、愛了解過去？ ​ 是因為，了解過去、捌遮—ê代誌，才有法度做出正確的ê 選擇。 ​ 若是啥物攏都毋知，就親像目鏡無拭清氣，看著—ê世界霧霧，茫茫渺渺，行到佗位攏感覺腦空空。 ​ 當然愛共目鏡拭清氣。若是知影家己ê過去、台灣ê過去，知影家己是按怎會當徛佇遮？紲落來欲行對佗一條路，人才有法度選擇較好ê路。 ​ 我真心向望，以後猶會用eh自由講故事。 ​ 726、823，咱鬥陣來，做伙共台灣拭清氣。大罷免大成功。